Policia Rrugore e Tiranës njoftoi mbrëmjen e së martës se gjatë kontrolleve në “Rrugën Bardhyl” ka ndaluar një mjet tip “Volkswagen” me drejtues shtetasin A. D., pasi është konstatuar që mbante në vendin e parë të mjetit, një fëmijë pa sisteme fiksimi, duke qenë në shkelje të rëndë të Kodit Rrugor.

Sipas policisë, gjatë kontrollit, ai ka shfaqur shenja të përdorimit të alkoolit. Pasi i është kërkuar që të kryejë testin e alkoolit, ai ka refuzuar dhe është larguar menjëherë me shpejtësi me makinën e tij. Punonjësit e policisë i janë vënë menjëherë në ndjekje dhe në rrugën “4 Dëshmorët” kanë bërë ndalimin e tij. Ai sërish ka refuzuar t’i nënshtrohej testit të alkoolit dhe pas këtij kundërshtimi është shoqëruar për në ambientet e Komisariatit të Policisë Nr. 4.

Edhe në ambientet e Komisariatit ka refuzuar t’i nënshtrohej testit të alkoolit. Policia thotë se gjatë shoqërimit për në Komisariat të drejtuesit të mjetit, janë njoftuar familjarët e fëmijës 5-vjeçar, i cili është marrë më pas nga nëna e tij. Pas kryerjes së testit të alkoolit ka rezultuar se A. D. drejtonte mjetin në gjendje të dehur në masën 0.86 mg/l.

Përveç ndëshkimit për shkeljet rrugore, ku i është pezulluar leja e drejtimit për 24 muaj, iu zbritën 15 pikë nga leja e drejtimit dhe u ndëshkua me 30 mijë lekë të rinj gjobë.Ai arrestua dhe tashmë akuzohet për veprat penale “Drejtim i automjeteve në gjendje të dehur” dhe “Mosbindja ndaj urdhrit të punonjësit të Policisë së rendit publik”.

“S’mban më ujë pilafi”, është slogani për thirrjen e shpërndarë në rrjet për të ftuar qytetarët ditën e nesërme të protestojnë kundër rritjes së çmimeve.Protesta është njoftuar të nisë nga sheshi “Skënderbej” në orën 18:00 të pasdites së nesërme dhe marshimi do të vijojë në drejtim të kryeministrisë.News 24 pyeti disa qytetarë në lidhje me këtë thirrje. Ata thonë që do të bashkohen në protestë pasi situata është bërë e papërballueshme.

“Gjithçka ka shkuar në stratosferë.

Patjetër që po as diskutohet që do të marrim pjesë. Duke filluar te nafta, te çmimet e shportës. Ekonomia në treg është zero. Rritja e çmimeve është fatkeqësi kombëtare. Vetëm të japë dorëheqjen qeveria”, shprehen disa prej tyre.

Gazetarja kosovare Arbana Xharra ka reaguar e revoltuar pasi festivali “Sunny Hill”, i cili do të mbahej në Prishtinë, u zhvendos në Tiranë. Përmes një postimi në Facebook, ajo shkruan se “vendimi për të zhvendosur këtë festival nga Kosova për shkak të neglizhimit të qeverisë së Kosovës është skandal.”

Arbana Xharra shkruan:

Asnje ngjarje ne vitete e fundit nuk ka pase vemendje mediale nderkombetare me te madhe sesa Festivali “Sunny Hill” ne Prishtine. Dua Lipaeshte nje prej kengetareve me te famshme boterore e cila nuk heziton asnjehere te permend Prishtinen, Kosoven, e me mburrje te tregoje se eshte shqiptare. Vendimi per te zhvendosur kete festival nga Kosova per shkak te neglizhimit te qeverise se Kosoves eshte skandal. Dua eshte e Prishtines, “Sunny Hill” eshte “Bregu i Diellit”, ky festival i duhet Kosoves, turp per Qeverine e Kosoves!”, shkruan Xharra.

Prokuroria e rrethit gjyqësor të Korçës ka proceduar penalisht 3 punonjës të komisariatit të këtij qyteti. Sipas Ora News shkak për këtë është një video e publikuar në Tik Tok, ku një shtetas bullizohet nga tre policët, i cili ishte shoqëruar në automjetin e policisë për masat kundër Covid 19. Policët e kanë shoqëruar për mungesën e maskës dhe më pas e akuzonin të riun për vjedhje. Ata i kanë thënë atij se kishte vjedhur gjithë Korçën, duke e cilësuar atë si “numrin 1” që kërkohej për vjedhje. I riu ka bërë kallëzim pranë AMP, ku sot ka filluar edhe procedimi penal ndaj policëve.

Aktori i njohur i humorit, Bes Kallaku trajtoi si temë të editorialit të tij në “Kosherja Show”, problematikat me të cilat përballet një turist në Shqipëri, duke filluar nga çmimet stratosferike. Gjatë emisionit ia ngriti dy pyetje që sipas “shqetësojnë” qytetarët në verë: “Ku do të shkojmë dhe a do të ikim me pushime.“

“Sa herë që vjen stina e verës kemi vetëm dy pyetje: Ku do të shkojmë dhe a do të ikim me pushime. Në vendet perëndimore është absurde të thuash a do të ikim me pushime, thjesht duan të zgjedhin vendin. Përveç rasteve kur preferojnë të vijnë për pushime në Shqipëri. Këtu te ne është e çuditshme. Jemi të vetmit që sa herë shkojmë te restoranti, dhe hamë mëngjesin, pyesim kamarierin sa është omëleta sot.

Sepse ndryshon çmimi sa herë ikën dhe vjen. Dhe kamarieri të shikon se si je vesh dhe të këput 20 mijë lekë. Por kur i thua ule pak çmimin, thotë e kam prerë faturën. Nuk është digjitale por nga këto me shkrim që e ka grisur faqen nga libri i historisë së djalit. Mos të flasim për higjienën përreth. Ke frikë të shkosh me fëmijët në plazh. Për të gjithë bizneset që ofrojnë shërbime turistike por dhe për shtetin, kërkojmë që të ketë sa më shumë hapësira publike për plazhistët”, u shpreh Bes Kallaku.

Një 34-vjeçar humbi jetën në Pogradec si pasojë e infarktit në zemër në Mars të këtij viti. Dy ditë para se të ndërronte jetë i riu kishte qenë në urgjencën e spitalit të Pogradecit.Aty ishte vizituar nga një mjek 44-vjeçar, për të cilin policia njoftoi këtë të martë procedimin në gjendje të lirë, për neglizhencë. Shkak u bë një kallëzim i motrës së 34-vjeçarit që humbi jetën. Ajo e akuzon mjekun në fjalë se nuk ka kryer ekzaminimet e duhura.

“Specialistët për Hetimin e Krimeve në Komisariatin e Policisë Pogradec referuan materialet në Prokurori dhe filloi procedimi penal në gjendje të lirë për shtetasin G. Z., 44 vjeç. Banues në Pogradec, për veprën penale “Neglizhenca në trajtimin mjekësor”, pas kallëzimit të bërë nga shtetasja D. M., 37 vjeçe, banuese në Fier.

E cila pretendon se shtetasi G. Z., me detyrë mjek në spitalin e Pogradecit, më datë 28.03.2022, tek urgjenca e këtij spitali, nuk ka kryer ekzaminimet e duhura ndaj vëllait të saj, shtetasit D. M., 34 vjeç, banues në Pogradec, i cili dy ditë më pas, ka ndërruar jetë në banesën e tij, për shkak të një infarkti në zemër”, tha policia në një njoftim për mediat.

Ndahet në mënyrë të parakohshme nga jeta Zëvendës-Prokurori i Rrethit Gjyqësor Korçë Ilia Bano. Prokurori Bano u nda nga jeta ne moshën 66-vjeçare pas betejës me një sëmundje të rëndë. Ilia Bano ka shërbyer prej 45 vitesh si Prokuror në disa rrethe të vendit! Lamtumira e Prokurorit Ilia Bano do të bëhet nesër në varrezat e Tufinës.

Rrugët e Selanikut janë kthyer në lumenj nga reshjet e dendura të shiut që filluan të bien orët e fundit duke krijuar probleme në qarkullim. Problemet e krijuara nga moti i keq që goditi Selanikun janë të shumta, ku këmbësorët e kanë pothuajse të pamundur për të lëvizur edhe në qendër të qytetit ndërsa drejtuesit e mjeteve thuajse nuk lëvizin dot në vende të ndryshme.Vihet re se ka shumë raportime për rënie të pemëve dhe breshër. Pamjet e publikuara janë nga stacioni i trenit në Egnatia Odos.

Një 39 vjeçar nga Tirana, i dënuar më parë për “Vjedhja me dhunë”, tashmë kishte gjetur një “hobi” të ri. Ai përdorte të dhënat dhe fotot e shtetasve të tjerë për të hapur profile në rrjetet sociale. Pas denoncimit të një vajze, ai përfundoi në prangat e policisë që organizuan operacionin e koduar “Username”, në bashkëpunim me Seksionin për Hetimin e Krimit Kompjuterik.

Njoftimi nga policia Tiranë

Finalizohet me sukses operacioni policor i koduar “Username”, nga Seksioni për Hetimin e Krimit Kompjuterik. Përdorte të dhënat e shtetasve të tjerë për të hapur llogari false në rrjete sociale, vihet në pranga 39-vjeçari. Specialistët e Seksionit për Hetimin e Krimit Kompjuterik në DVP Tiranë, pas kallëzimit të bërë nga shtetasja A. V., se një shtetas hapte llogari në rrjetet sociale me të dhënat dhe fotot e saj personale, në mënyrë të vazhdueshme, organizuan punën për identifikimin dhe kapjen e autorit të dyshuar.

Në kuadër të operacionit policor të koduar “Username” u ndalua, për veprën penale “Falsifikimi kompjuterik”, shtetasi:

– E. M., 39 vjeç, banues në Tiranë, i dënuar më parë për veprën penale “Vjedhja me dhunë”.

Pas verifikimeve të kryera nga specialistët e Krimit Kompjuterik ka rezultuar se ky shtetas ka hapur në mënyrë të vazhdueshme, llogari false në rrjetet sociale, me gjeneralitetet dhe fotot e shtetasve të tjerë.

Materialet procedurale për këtë rast i kaluan Prokurorisë, për veprime të mëtejshme. Drejtoria Vendore e Policisë Tiranë, në bashkëpunim me Sektorin e Krimit Kibernetik në Policinë e Shtetit, është duke hetuar të gjitha rastet e denoncimeve nga qytetarët, për keqpërdorimin e të dhënave personale për hapjen e llogarive false në rrjetet sociale dhe çdo rast tjetër të falsifikimit kompjuterik, vepër penale për të cilën Kodi Penal parashikon dënimin me burgim nga gjashtë muaj deri në gjashtë vjet

Më 28 maj u nda nga jeta në moshën 56-vjeçare ish-presidenti, Bujar Nishani. Ai ndërroi jetë në një spital privat në Gjermani. Aty ishte dërguar para një muaji për përkujdesje intensive pas përkeqësimit të gjendjes së tij shëndetësore. Ish-presidenti po ashtu vuante nga një sëmundje auto-imune.Nishani la pas bashkëshorten dhe dy fëmijët, djalin dhe vajzën. Kjo e fundit ka reaguar pak orë më parë përmes një postimi në Instastory. Fiona ka postuar një foto nga fëmijëria, ku shfaqet në shpatullat e të atit. Një moment ky i paharrueshëm për të.

“Ende nuk mbushem me frymë”, ka shkruar Fiona mbi foton që ka shkrepur një moment të paharrueshëm me babain e saj tashmë të ndjerë.

Moti ka marrë një kthesë të fortë nga dielli dhe temperaturat e larta në rrebeshe shiu dhe breshër. Ditën e sotme rreshje të fuqishme breshëri kanë përfshirë Leskovikun , të cilat kanë nisur paraditen e sotme dhe kanë zgjatur më shumë se 30 minuta duke dëmtuar kështu jo vetëm të mbjellat dhe vreshtarinë e fermerëve, por edhe drutë frutorë .Kjo është hera e dytë që Kolonja preket nga breshëri, ku para disa javësh dëmtime të mëdha pati dhe në fshatin Boshanj.

Në media është publikuar një video shokuese nga një dasmë në Uzbekistan. Ndërsa ndodheshin në podium, dhëndri papritmas godet nusen pasi ajo e mundi në një lojë.Pamjet tregojnë të sapomartuarit në skenë, disa sekonda pasi kishte përfunduar loja. Kur burri kupton se kishte humbur, ai papritmas godet fort në kokë nusen e cila po qëndronte pranë shoqërueses së saj.

Nusja në fillim shtanget dhe dridhet nga dhimbja ndërsa të ftuarit e tjerë pushojnë së qeshuri dhe brohoritur kur kuptuan se çfarë kishte ndodhur.Më pas ajo largohet nga skena nga dy shoqe dhe vendos kokën në dorë. Shoqëruesi i dhëndrit po ashtu shfaqet i habitur dhe i nervozuar nga veprimet e mikut të tij.

Kjo video ka ngjallur reagime dhe diskutime të mëdha në rrjet, ku shumica i sugjeronin nuses të divorcohej direkt nga burri i saj, me të cilin është sapo martuar.

Piloti grek Anagnostopoulos, i cili në një histori makabër vrau bashkëshorten e tij 20-vjeçare Caroline Crouch në shtëpinë e tyre luksoze në Athinë, ka njoftuar mediat se është i frikësuar për jetën e tij.Pas marrjes së dënimit, Babis është transferuar në një qeli me një vrasës tjetër dhe mendon se shoku i tij i dhomës mund ta vrasë.Javën e kaluar MailOnline zbuloi se ai ishte sulmuar në burgun e Korydallos nga një i burgosur gjeorgjian dhe më pas u transferua në burgun Malandrino, 250 milje në veri, i cili konsiderohet si “Alcatrazi grek”.

Ai tani po ndan qelinë me një vrasës të paidentifikuar shqiptar dhe Babis dhe avokati i tij janë të shqetësuar për jetën e tij mes frikës se një “kontratë vdekjeje” rëndon tani mbi të, pasi më herët ai kishte akuzuar shqiptarët dhe gjeorgjianët si grabitësit që ekzekutuan bashkëshorten e tij Caroline.

Babai i Caroline, David, tha për Mail Online: “Duket se ai nuk është i lumtur në strehimin e tij të ri dhe ai dëshiron të transferohet përsëri në burgun Korydallos ku do të ndihej më i sigurt.

“Ai beson se ka të paktën një, por ndoshta disa kontrata për vdekjen e tij. Besoj se njerëzit me të cilët ai ishte i përfshirë para se të vriste vajzën time janë gjithashtu të prirur që ai të heshtet në rast se ai përpiqet të bëjë një lloj marrëveshjeje. Ndjenja ime është se ai duhet të vuajë të paktën disa vjet para se të vritet”, tha ai.

34-vjeçari u dënua me burgim të përjetshëm muajin e kaluar për mbytjen e gruas së tij Caroline vitin e kaluar përpara vajzës së tyre 11 muajshe, Lydia. Vrasësi me zemër të ftohtë më pas mbyti qenin e familjes për ta bërë vrasjen të dukej si një grabitje dhe derdhi lot krokodili para policisë dhe familjes së shkatërruar të Caroline, para se të gozhdohej nga hetuesit që zbuluan pas vetëm një muaji historinë e sajuar prej tij.