Protesta kundër kryeministrit Edi Rama ka hyrë këtë të hënë në ditën e 79-të. Qytetarët janë mbledhur sërish në shesh, duke deklaruar se do ta vazhdojnë revoltën deri në largimin e qeverisë dhe të klasës politike që ata e konsiderojnë përgjegjëse për situatën në vend. Në protestë foli edhe Luçiana Kokaj, e cila deklaroi se pjesëmarrësit kanë treguar gjatë këtyre 79 ditëve se nuk kanë ndërmend të largohen nga sheshi.

“Në 79 ditë ju kemi treguar që jemi shqiptarë të vërtetë dhe nuk e lëshojmë këtë shesh pa shpëtuar Shqipërinë”, tha Kokaj.

Ajo iu përgjigj edhe kritikave dhe debateve që kanë shoqëruar protestën, përfshirë pretendimet se disa pjesëmarrës nuk janë lejuar të marrin fjalën.

“Thanë që u larguan flamingot dhe erdhën sorrat. Më vjen shumë keq, flamingot janë mes nesh. Shumë na kanë akuzuar se nuk janë lejuar të flasin… Por në këto 79 ditë punën më të vështirë në shesh e kanë pasur këta çuna që mundohen të sigurojnë mbarëvajtjen”, deklaroi ajo.

Kokaj theksoi se protesta nuk ka një pronar apo drejtues individual. Sipas saj, drejtimin e saj e ka çdo qytetar që beson se sistemi politik duhet të marrë fund.

“Sheshi ka një pronar dhe një drejtues dhe është çdo shqiptar që beson se këtij sistemi i ka ardhur fundi”, tha protestuesja.

Në fund, Kokaj e lidhi vazhdimin e revoltës me kërkesën për largimin e klasës politike që ka drejtuar vendin gjatë 36 viteve të fundit.

“Për një gjë jemi të sigurt, që duam të largojmë këtë kastë politike që na ka marrë peng të ardhmen”,përfundoi ajo.

Protesta qytetare kundër qeverisë dhe kryeministrit Edi Rama vijon prej 79 ditësh, ndërsa pjesëmarrësit thonë se lëvizja po merr gjithnjë e më shumë mbështetje, veçanërisht nga të rinjtë. I ftuar në News24, Ilir Xhemalaj foli për arsyet që kanë mbajtur të bashkuar protestuesit dhe për atë që e konsideron si rezultatet e deritanishme të kësaj lëvizjeje.

Sipas Xhemalajt, protestuesit i bashkon fillimisht “atdhedashuria” dhe më pas kërkesa për ndryshim politik.

“Na bashkon qëllimi i përbashkët, e para atdhedashuria qe kemi për vendin dhe e dyta është rrëzimi i qeverisë aktuale dhe e gjithë sistemit që ka mbajtur të bllokuar energjinë e të rinjve. Kjo energji është derdhur në shesh dhe populli më në fund kërkon ndryshim. Ajo që i bashkon njerëzit janë hallet dhe problematikat, që i kanë të njëjtat. Ne aty e konsiderojmë vetën një familje të madhe, sheshi na ka bërë bashkë dhe ta çojmë përpara këtë protestë. Ne luftën e kemi vetëm me qeverinë dhe sistemin”, tha Ilir Xhemalaj.

Xhemalaj tha se kjo protesta ka shumë arritje, por renditi tre më madhoret:

“E para, 79 ditë protestë, ka parë ndonjëherë Shqipëria kaq ditë protesta? Jo. Jemi në një moment që duhet të bëjmë ndryshimin. Nuk ka parë ndonjëherë Shqipëria këto protesta

E dyta, është ardhja e të rinjve në shesh. Të rinjtë rrinin në kafe ose largoheshin, ndërsa sot janë në shesh dhe po luftojnë dhëmbë për dhëmbë me këtë sistem, sepse duan që të rrinë në këtë vend

E treta, më në fund bota e pa mbretin lakuriq, pa realitetin kush është Kryeministri i Shqipërisë. E panë që ishte një kryeministër i kohëve të shkuara. Është një kryeministër që nuk ka më vend në Shqipëri. Sot kemi nevojë për djem e vajza të rinj që ti japin Shqipërisë atë që duan. Unë kam 36 që pres që Shqipëria të bëhet Evropë. Këta duhet të japin dorëheqjen dhe ti lënë rrugën rinisë”, deklaroi Xhemalaj.

Analisti Frrok Çupi është ndalur te konfliktet dhe përçarjet ku u përfshinë protestuesit mbrëmjen e së dielës, gjatë një interviste në ABC News. Kujtojmë se sherri ndodhi mes dy grupeve të cilët u përplasën fizikisht dhe u desh ndërhyrja e personave të tjerë të pranishëm për të qetësuar situatën.

Frrok Çupi thotë se për 10 mijë euro që kishin për të ndarë ata shitën shpirtin, interesat dhe vendin, ai shton se dhuna mes këtij grupimi është prezente, madje ngre edhe pyetjen: Po sikur të vrasin njëri-tjetrin?

“Kjo ishte një përplasje e domosdoshme mes tyre. Për shkak se është krijuar si fole konflikti, në errësirë të plotë. Në ilegalitet, erdhën ilegalë pa e njohur njëri-tjetrin. Janë ushtrimi i instikteve të dhunës. Ata erdhën pa e kuptuar se kush është kush, prej gjithë kësaj kohe nuk e dinin kush ishte, ecën në mënyrë të pasigurtë, pa drejtues, pa qartësi.

Konflikti tani është i domosdoshëm, kanë 70 ditë, tani po njohin njëri-tjetrin.

Një 10 mijë euro që kishin për të ndarë dje, dhe ferrën njëri-tjetrit. Kanë shitur interesa, shpirtin, marrëdhëniet familjare, vendin. Stabiliteti i tyre është mbajtur prej dhunës. Ky është fenomen i krijuar jashtë mitrës së vendit. Këta kanë instikte të çuditshme dhune. Qytetarët e duan të lirë siç e kanë pasur. Po sikur ata të vrasin njëri-tjetrin? Konflikti i tyre është i domosdoshëm për të realizuar paqen qytetare. Marrëdhëniet e opozitës me këtë grupim, është njësoj si tenxherja me garuzhden. Protesta është me stofin e PD”, theksoi analisti Frrok Çupi në ABC News.

Kreu i Lëvizjes Bashkë, Arlind Qori nuk ka munguar as këtë ditë të 79-të të protestës së qytetarëve, të cilët po vijojnë prej ditësh tanimë të kërkojnë dorëheqjen e kryeministrit Edi Rama dhe të së gjithë klasës së vjetër politike.

Teksa po përshkonte Bulevardin “Dëshmorët e Kombit”, së bashku me protestuesit e tjerë, Qori dëgjohet teksa thotë që populli është i bindur edhe do të vazhdojë këtë “betejë” deri në fund, deri në arritjen e “Shqipërisë së re”.

Sipas kreut të “Lëvizjes Bashkë”, kryeministri Edi Rama ka bërë gjithçka për të shuar këtë protestë, mirëpo ai u shpreh i vendosur se asnjë tentativë e kreut të qeverisë nuk do ta zhbëjë këtë lëvizje qytetare.

Edi Rama ka bërë gjithçka që të shuajë protestën. KA futur para, policë, halabanë, e prapë se prapë protestës nuk ka çfarë i bën. Nuk ka çfarë i bën një popull iqë tashmë është zgjuar dhe nuk ka ndërmend të heqë dorë nga dinjiteti. Askush nuk mund ta nëpërkëmbë më popullin shqiptar, të gjithë ne do të luftojmë për demokraci dhe drejtësi, për mbi të gjitha për Shqipërinë e re të ëndrrave tona”,dëgjohet teksa thotë Qori.

View this post on Instagram

Banorët e Divjakës kanë vijuar protestën kundër propozimit të Partisë Socialiste për hartën e re territoriale, e cila parashikon shkrirjen e 15 bashkive. Prej 17 ditësh, banorët e divjakës po kundërshtojnë masivisht shkrirjen e bashkisës së tyre dhe bashkimin me Lushnjën.

Gjatë tubimit, banorët u bënë thirrje qytetarëve që të bashkohen në protestë, pasi sipas tyre, bashkia nuk mund të shkrihet për një kapriço politike. Ata janë shprehur të vendosur se do vijojnë ta mbrojnë Divjakën.

“Do e mbrojmë Divjakën tonë”, tha një qyetar.

Në vijim të protestës, një qytetar ka deklarua se Rama do ta përqendrojë pushtetin në një dorë. Qytetarët kanë shtruar edhe pyetjen se si mund të shkrihet një bashki për çështje politike.

“Kjo gjë është jokushtetuese. Këta duan që të përqendrojnë pushtetin në një dorë. Si mund të shkrish një bashki për çështje politike. Nuk mund të shkrish një identitet për një kapriço politike. Do ta mbrojmë deri në momentin e fundit”, tha një tjetër banor.

Në fund, protesta u mbyll me një marshim në rrugët e qytetit, ndërsa pjesëmarrësit njoftuan se do të vijojnë protestat edhe në ditët në vijim.

Katër persona kanë pësuar djegie të rënda në trup, ndërsa disa të tjerë kanë mbetur të dëmtuar më lehtë, si pasojë e shpërthimit të motorrit të një skafi. Ngjarja ka ndodhur në Porto Palermo të Vlorës, ku dyshohet se shkak i shpërthimit ka qenë benzina që gjendej në skaf.

Sipas informacioneve paraprake, katër prej të lënduarve kanë pësuar djegie të shumta në pjesë të ndryshme të trupit.

Ata janë dërguar me urgjencë në Tiranë, për të marrë ndihmë më të specializuar mjekësore.

Në vendngjarje kanë mbërritur shërbimet e Policisë dhe Ambulancës, ndërsa po punohet për zbardhjen e plotë të rrethanave të shpërthimit.

Korça nuk i ka dhënë ende fund atmosferës festive. Pas përfundimit të Festës së Birrës, një tjetër event pritet të sjellë humor dhe spektakël në qytet.

Sot, “Portokalli” zbarkon në Korçë, duke sjellë në skenë personazhe të njohura dhe humorin që ka shoqëruar prej vitesh publikun shqiptar.

Këtë herë, protagonisti është humori, me një mbrëmje që pritet të mbledhë qytetarë dhe vizitorë.

“Portokalli” premton batuta, personazhe dhe momente argëtuese, duke i dhënë Korçës një tjetër mbrëmje të veçantë pas netëve të mbushura me muzikë.

View this post on Instagram

Protesta e 79-të kundër qeverisë pritet të zhvillohet sot në Tiranë, pas më shumë se dy muajsh tubime të përditshme. Qytetarët vijojnë të kërkojnë dorëheqjen e kryeministrit Edi Rama dhe ndryshimin politik, ndërsa marshimi pritet të përfshijë sërish akset kryesore të kryeqytetit.

Në protestat e fundit janë bashkuar edhe shqiptarë nga diaspora, ndërsa thirrjet “Rama, jep dorëheqjen!” dhe “Atdheu nuk shitet!” kanë shoqëruar tubimet.

Protestuesit shprehen të vendosur të vijojnë qëndresën deri në plotësimin e kërkesave të tyre.

Skënderbeu i Korçës prezanton fanellën e re, një nga elementet më të shumëpritura për sezonin e ri futbollistik.

Me ngjyrat tradicionale të klubit dhe një dizajn modern, fanella e re synon të përcjellë identitetin dhe historinë e një prej skuadrave më të njohura të futbollit shqiptar.

Tifozët korçarë tashmë mund ta shohin modelin e ri, i cili pritet të shoqërojë Skënderbeun në sfidat e sezonit të ri.

Një fanellë e re, por me të njëjtat ngjyra dhe krenari korçare. ⚽🔴⚪

FC SKËNDERBEU 26/27 Away Authentic Jersey

Pas lajmit se Megi Pojani nuk do të jetë më në drejtimin e “Për’puthen”, kanë nisur të qarkullojnë edhe emrat e parë për moderatoren që mund ta pasojë në sezonin e ri. Largimi i Pojanit është raportuar së fundmi, ndërsa ende nuk është bërë publik emri i pasueses.

Dy emrat që po përfliten janë Heidi Baci dhe Selin Bollati, të dyja të njohura për publikun edhe nga eksperiencat e tyre në “Big Brother VIP Albania”.

Heidi Baci ishte një prej protagonisteve të edicionit të tretë të “Big Brother VIP Albania” dhe ka tashmë eksperiencë në moderim në Top Channel. Ajo ka qenë pjesë e “Goca dhe Gra”, ndërsa më pas iu besua edhe drejtimi i “Big Brother VIP Fan Club” dhe së fundmi në “Wake Up”.

Emri tjetër është Selin Bollati, fituesja e “Big Brother VIP Albania 5”, e cila pas përfundimit të reality show-t ka vijuar të jetë mjaft e pranishme në vëmendjen e publikut.

Për momentin nuk dihet se cila prej tyre është më pranë drejtimit të formatit dhe nga Top Channel nuk ka ende një njoftim zyrtar.

Ajo që pritet të ndryshojë është pikërisht figura në krye të programit. Megi Pojani e ka drejtuar “Për’puthen” që prej vitit 2023, ndërsa sezoni i ri pritet të sjellë një tjetër emër në moderim

Nëse zgjedhja përfundimtare do të jetë Heidi Baci, Selin Bollati apo një emër tjetër, mbetet për t’u parë me afrimin e sezonit të ri televiziv.

Atmosfera në natën e fundit të Festës së Birrës në Korçë u ngrit në maksimum me ngjitjen në skenë të grupit Three Dots. Me ritmet e këngëve të tyre dhe energjinë e veçantë që i karakterizon, artistët arritën të ndezin publikun në Polin e Eventeve në Drenovë, duke e kthyer skenën në një prej momenteve më të komentuara të mbrëmjes.

“Na çmende fare” ishte një prej reagimeve që përshkroi atmosferën e krijuar, ndërsa publiku këndoi dhe kërceu së bashku me artistët.

Three Dots ishte pjesë e programit të natës së pestë të edicionit të 20-të të Festës së Birrës, së bashku me Rilind Alimanin dhe Dafina Zeqirin.

Por performanca e Three Dots ishte padyshim një nga ato momente që e ngritën temperaturën e festës: muzikë, duartrokitje dhe një publik që nuk u ndal së kërcyeri. 🍻🔥

View this post on Instagram

Ka emra që i përkasin një skuadre, një qyteti apo një brezi. Dhe ka emra që kapërcejnë kohën. Jani Kaçi është një prej tyre. Në ditën e tij të lindjes, Korça kujton me krenari një nga figurat më të shquara që ka nxjerrë sporti shqiptar. Një portier që nuk mbrojti vetëm një portë, por për vite me radhë mbajti mbi supe emocionet, shpresat dhe krenarinë e mijëra tifozëve.

Nga fusha e Skënderbeut te Partizani dhe Kombëtarja, karriera e tij u ndërtua mbi talentin, karakterin dhe një përkushtim të jashtëzakonshëm. Në një kohë kur futbolli kërkonte burrëri, guxim dhe besim te vetja, Kaçi u kthye në një figurë që frymëzonte respekt sa herë vendosej mes dy shtyllave.

Por madhështia e një sportisti nuk matet vetëm me pritjet, ndeshjet apo trofetë. Ajo matet edhe me gjurmën që lë pas.

Dhe Jani Kaçi zgjodhi ta vazhdonte këtë rrugëtim edhe pas futbollit, duke iu kushtuar edukimit dhe brezave të rinj. Përmes mësimdhënies dhe punës me të rinjtë, ai vazhdoi t’u përcillte të tjerëve dashurinë për sportin, disiplinën dhe dëshirën për të qenë gjithmonë më të mirë.

Sot, urimi për të nuk është thjesht një urim ditëlindjeje. Është një falënderim për një jetë të lidhur me sportin, për emocionet e dhuruara dhe për një emër që mbetet pjesë e identitetit sportiv të Korçës.

Gëzuar ditëlindjen, Jani Kaçi!

Urojmë që vitet të sjellin shëndet, qetësi dhe shumë momente të bukura pranë njerëzve të dashur. Historia e sportit shqiptar ka emra që nuk harrohen — dhe emri yt është padyshim një prej tyre.

Pas ditëve të festës dhe atmosferës së Festës së Birrës në Drenovë, banorët e Korçës janë përballur këtë mëngjes edhe me lëkundje të lehta tërmeti. Sipas të dhënave të EMSC, tërmeti ka pasur magnitudë 3.2 dhe epiqendra është lokalizuar në zonën e Drenovës.

Lëkundjet janë ndjerë në disa zona të Korçës, por intensiteti ka qenë i ulët. Deri më tani, nuk raportohet për dëme materiale .

Pas netëve me muzikë, koncerte dhe mijëra qytetarë në Drenovë për Festën e Birrës, këtë mëngjes ishte toka ajo që “ngriti” pak atmosferën në Korçë.

Lëkundje tërmeti janë ndjerë këtë mëngjes në Korçë .Sipas EMSC , termeti ka qene 3.2 balle ndersa epiqendra ka qenë në Drenovë .Intensiteti i tërmetit ka qenë i ulët dhe 

nuk raportohet për dëme materiale. 

Me ritmet e këngës “Bonu i Sinqertë”, Dafina Zeqiri i ka dhënë fund netëve festive të Festës së Birrës në Korçë. Artistja ka sjellë në skenë energjinë e saj, duke elektrizuar atmosferën në natën përmbyllëse të eventit. Publiku ka kënduar dhe kërcyer nën ritmet e këngëve të saj, duke e kthyer mbylljen e festës në një spektakël të veçantë.

Pas disa netësh me muzikë, artistë të njohur dhe mijëra pjesëmarrës, Festa e Birrës mbyllet me një atmosferë të zjarrtë dhe me Dafina Zeqirin në qendër të vëmendjes.

“Bonu i Sinqertë” ishte një nga momentet që shoqëroi natën e fundit, duke i dhënë një fund ritmik një prej aktiviteteve më të shumëpritura verore në Korçë.

View this post on Instagram