Nga Mero Baze 

Rruga Qukës–Qafë Plloçë është vërtet një projekt ekonomik i gabuar. Nuk është fjala se është i gabuar si lidhje alternative me Korçën, por si projekt inxhinierik. Është një projekt i miratuar nën qeverisjen e Sali Berishës dhe kompanitë janë përzgjedhur nën pushtetin e tij, kryesisht nën lobimin e ish-ministrit të Financave Ritvan Bode, që u pasua me po aq zell nga socialisti i ri më i rëndësishëm i qarkut, Niko Peleshi.

Projekti inxhinierik i nxituar dhe i përciptë bëri që, ndërkohë që punimet kishin filluar, të kuptohej se lotet nuk lidheshin me njëri-tjetrin dhe duheshin fonde shtesë.

Tani, meqë Belinda Balluku është në qendër të vëmendjes për shkak të përballjes me drejtësinë, shikoj që i janë turrur të gjithë asaj dhe për këtë projekt. Në këtë projekt Balluku është vrima e fundit e kavallit. Ai ka nisur nga Sokol Olldashi, ka vazhduar me Haxhinaston, Gjiknurin dhe Balluku është ministrja e fundit që ka pasur punë me të. Madje është ministrja që i dha fund një projekti të tmerrshëm që u kthye në gëlltitës fondesh.

Është pak a shumë si projekti i rrugës Tiranë–Elbasan, që Berisha e mbaroi shpejt e shpejt, pa projekt të saktë inxhinierik, dhe pastaj u deshën 50 milionë euro të stabilizohej rrëshqitja e Krrabës që nuk të lejonte të kaloje, vetëm se rruga ishte kaluar gabimisht në krahun e rrëshqitjes dhe jo përtej lumit.

Apo si projekti i rrugës Gjirokastër–Tepelenë, që nuk kaloi nga ana e Hormovës por përballë saj, dhe tani, siç e shikoni, rreth 2 km rrugë është e pandërtuar pasi pas çdo shiu rrëzohet një faqe mali në rrugë dhe duhet të zhvendosësh dheun. Është një betejë e humbur me terrenin për shkak të vendimeve politike dhe jo inxhinierike.

Defekte të tilla janë defekte projektimi, që i kushtojnë pastaj me miliona euro ekonomisë shqiptare. Në rastin e Qukës–Qafë Plloçë kësaj i shtohet edhe kotësia e projektit, i cili mund të ishte zëvendësuar me një rrugë rurale për zonën e Mokrës me një të dhjetën e këtyre shpenzimeve.

Mbi të gjitha këto projekte nuk dështojnë nga kompanitë ndërtuese. Kompanitë kanë përpara projektin dhe zbatojnë atë. Në rastin konkret, rruga ka kaluar në vendin më të gabuar të mundshëm, në një masiv të përzier mes argjilave, qymyreve dhe shkëmbinjve të copëtuar, që me pak shi kthehen në vullkan balte.

Ajo rrugë nuk qetësohet më nëse nuk devijohet ose nëse nuk zhduket tërësisht shpati përmes një fondi që do ta bënte edhe më të madhe gropën financiare.

Po të ishte gabim zbatimi, do ishte dëmi më i lehtë, pasi e zgjidhje me kompaninë ndërtuese. Problemi është tek projektimi i rrugës dhe akoma më keq tek ideja e ndërtimit të saj. Nëse do gjykosh atë, duhet të çosh para drejtësisë dy kryeministrat, Berisha dhe Rama, dhe gjithë ministrat e infrastrukturës që nga 2012 kur ka filluar procedura. Po deshët ta bëni këtë, bëjeni, por të gjithë që flasin janë pjesë e kësaj balte dhe gurëve që na kanë zënë rrugën. Edhe pse në modë këtë javë është të shash Ballukun./ TemA

Autoritetet e Republikës së Greqisë kanë shpallur dje me statusin “non grata” gazetarin Artan Hoxha, duke e cilësuar “person të padëshirueshëm” dhe kërcënim për rendin publik. Vendimi parashikon ndalim të përhershëm për hyrjen e tij në territorin grek.

Hoxha po udhëtonte drejt Janinës, kur u ndalua nga Policia kufitare greke në pikën e kalimit në Kakavijë. Në sportelin e kontrollit të pasaportave, atij iu komunikua se hyrja në Greqi nuk lejohej, pasi konsiderohej “rrezik për rendin publik dhe sigurinë e brendshme”.

Gazetarit iu mor pasaporta dhe u mbajt për rreth një orë në ambientet e Policisë greke. Rreth orës 10:30 të mëngjesit, me orën vendore, atij iu dorëzua vendimi zyrtar që e shpall “non grata” për një afat të pacaktuar.

Në dokumentin zyrtar të Policisë greke thuhet se Artan Hoxha:

-Është karakterizuar si person i padëshirueshëm;

-Konsiderohet i rrezikshëm për rendin publik, sigurinë e brendshme, shëndetin publik ose marrëdhëniet ndërkombëtare të një ose më shumë shteteve të BE-së.

Më pas, autoritetet greke i vendosën një kryq me stilolaps mbi vulën e hyrjes në pasaportë dhe i kërkuan të largohej menjëherë nga territori grek.

Ky nuk është rasti i parë kur gazetarë shqiptarë përballen me mase të tilla nga autoritetet greke, sidomos ata që kanë denoncuar aktivitete të paligjshme në dëm të interesave të Shqipërisë apo çështjeve të ndjeshme kombëtare.

Sipas komunikimit që i është bërë Hoxhës nga Policia greke, vendimi për ta shpallur “non grata” është marrë në fillim të vitit 2024, në kulmin e fushatës për zgjedhjet e Parlamentit Evropian.

Në atë periudhë, në listën e partisë “Demokracia e Re” të kryeministrit Kyriakos Mitsotakis kandidonte edhe Fredi Beleri, politikani kontrovers në vend për lidhjet e tija me Greqinë dhe i cili ka shtetësi shqiptare dhe greke.

Artan Hoxha e ka denoncuar publikisht rolin e Belerit në “Masakrën e Peshkëpisë” në vitin 1994, ku u vranë dy Dëshmorë të Atdheut dhe është përballur me të në procese gjyqësore në Gjykatën Penale të Tiranës gjatë viteve 2023–2024.

Ai ka publikuar gjithashtu artikuj investigativë në median greke gjatë fushatës për zgjedhjet evropiane, ku ka ngritur akuza për aktivitet të dëmshëm ndaj interesave shqiptare.

Gazetari i Top Channel, Marin Mema, ka folur në “Top Story” sa i përket non-gratës që i është vendosur nga Greqia në vitin 2012. Ai shprehet se nuk mund ta çojë dot këtë çështje deri në Strasburg, pasi në gjyqet greke nuk e lejojnë të kalojë shkallët përkatëse. Ai gjithashtu flet dhe për shumë persona të tjerë që janë non-grata nga Greqia për disa arsye që ai i përshkruan si absurde.

“Në 2026 hyj në vitin e 14-të. Jam përpjekur ta çoj në gjykatë.

Kam kontaktuar një avokat, por nuk të lënë në Greqi të kalosh shkallët përkatëse që ta çosh deri në Strasburg, sepse e dinë që në Strasburg e humbin. Nuk futesh fare në procedurë për t’i kaluar këto shkallë. Duhet të kalosh shkallët në shtetin përkatës që ta kalosh në Strasburg.

Unë kam të njëjtin kryq. Në vendet e tjera qeshnin kur i thoja se lidhej me një qëndrim për Greqinë. Ajo që nuk kemi përmendur saç duhet është që kjo histori nuk është ndalur asnjëherë. Kur jam shpallur non-grata në vitin 2012, bashkë me mua në atë kohë janë shpallur non-grata edhe dy të tjerë që ishin me mua.

Pak muaj më parë është shpallur një aktivist non-grata se tha ‘Rroftë Çamëria’ kur erdhi Mitsotakis. Kjo gjë nuk është ndalur. Vazhdon.

Një djalë kishte bërë foto në Çamëri me fëmijën e tij dhe bashkëshorten. E morën në komisariat dhe i thanë: ‘Të ka çuar Marin Mema’. Ai djalë nuk jetonte në Shqipëri. Jetonte në Suedi. I ka ndodhur shumë personave.

Mua kjo non-grata nuk më ka kushtuar asgjë, sepse kjo nuk e bllokon të vërtetën. Ti mund të bllokosh Marinin, por nuk bllokon të vërtetën të dalë në sipërfaqe. Kjo i ka dhënë më shumë zë zërit të së vërtetës. Unë habitem pse nuk ka një reagim të vërtetë.

Asnjëherë nuk është mbajtur një qëndrim serioz për ta adresuar këtë çështje. Futem në vitin e 14-të. A thua se jam ky terrorist i madh që në vend të kallashnikovit kisha stilolapsin”, tha Mema.

Pensionistët në të gjithë vendin do të përfitojnë bonusin e fundvitit duke nisur nga data 1 dhjetor, ka njoftuar Ministrja e Ekonomisë dhe Inovacionit, Delina Ibrahimaj. Ibrahimaj deklaroi se vlera e bonusit mbetet e njëjtë me atë të vitit të kaluar, duke sqaruar formulën e shpërndarjes sipas kategorive të pensioneve:

150 mijë lekë të vjetra për pensionistët që marrin pension nën 200 mijë lekë të vjetra.
100 mijë lekë të vjetra për ata që marrin pension mbi 200 mijë lekë të vjetra.

Ministrja theksoi se shpërndarja e bonusit nuk lidhet me premtime të zgjatura në kohë, siç është pretenduar në disa reagime publike, por është pjesë e një pakete të qëndrueshme investimesh për pensionet.

Sipas saj, mazhoranca ka parashikuar një buxhet prej 1.7 miliardë eurosh deri në vitin 2030, që do të mbulojë jo vetëm bonuset, por edhe indeksimet vjetore të pensioneve. Vetëm indeksimi llogaritet të ketë një vlerë rreth 50 milionë euro në vit.

“Bonusi i fundvitit do të jepet dhe do të jetë i barabartë me atë të vitit të kaluar. Kemi arritur në një nivel ekonomik që na lejon të gjenerojmë të ardhura dhe t’i rishpërndajmë te të gjithë brezat”, u shpreh ndër të tjera Ibrahimaj.

Sipas ministrisë, masa financiare konsiderohet si një prej angazhimeve kryesore sociale të buxhetit të shtetit për vitet e ardhshme, duke synuar lehtësimin e shtresave në nevojë dhe rritjen e mbështetjes për të moshuarit.