Korçë/ Besimtarët ortodoksë kanë kremtuar në kishën ortodokse “Katedrale” të premten e zezë, ditën që simbolizon vdekjen e Jezu Krishtit. Udhëtimi i Epitafit në Korçë filloi me grumbullimin e besimtarëve në pesë kishat përkatëse: në Katedralen “Ngjallja e Krishtit”, Kishën e Shën Ilias, Kishën e Mitropolisë, Kishën e Shën Sotirit, dhe Kishën e Shën Thanasit.

Me pas të gjithë besimtarët u mblodhën tek sheshi para Katedrales.

Prej kësaj të fundit doli Epitafi i Krishtit. Nën tingujt e vajtimeve dhe këngëve fetare kushtuar këtij momenti, ata kanë ecur në zonën pedonale të qytetit dhe pastaj duke vazhduar në unazën e vogël të qytetit u rikthyen tek Katedralja “Ngjallja e Krishtit”. 

Dita e premte e kësaj fundjave, në liturgjinë fetare, përkon me të Premten e zezë, që simbolizon vdekjen e Jezusit.

https://www.facebook.com/share/v/1CCeSuSRpF/

https://www.facebook.com/share/v/1MuxxUjBYG/?mibextid=wwXIfr

Ditën e sotme vendi ynë do të ndikohet nga kushte atmosferike të qëndrueshme. Sipas Shërbimit Meteorologjik Ushtarak moti parashikohet me alternime kthjellimesh dhe vranësira kalimtare kryesisht pas orëve të pasdites.

Era do të fryjë me drejtim veriperëndim-verilindje me shpejtësi mesatare deri në 6m/s, e cila hera-herës pritet të fitojë shpejtësi deri në 12m/s.

Valëzimi në detet Adriatik dhe Jon do të jetë i forcës 1-2 ballë.

Në mbledhjen e zhvilluar këtë të premte, më 10 prill, Këshilli i Ministrave miratoi një paketë të re nismash ligjore që prekin drejtpërdrejt ekonominë dhe sistemin fiskal në vend. Gjatë komunikimit me mediat, Ministrja e Ekonomisë dhe Inovacionit, Delina Ibrahimaj bëri të ditur se një nga projektligjet kryesore lidhet me tatimin mbi të ardhurat. 

Sipas saj, ndryshimet e propozuara synojnë një qasje më të drejtë fiskale, duke marrë në konsideratë edhe shqiptarët që jetojnë jashtë, si dhe shtetasit e huaj që kanë zgjedhur të jetojnë në Shqipëri.

Një nga pikat kyçe të këtij projektligji është fakti që individët që konsiderohen rezidentë tatimorë në Shqipëri, por që sigurojnë të ardhura në vende të tjera dhe i paguajnë taksat atje, nuk do të tatohen sërish në Shqipëri.

Kjo masë synon të shmangë tatimin e dyfishtë dhe të krijojë një klimë më të favorshme për investim dhe jetesë.

Ministrja theksoi gjithashtu se kjo politikë lidhet me strategjinë për të tërhequr pensionistë nga jashtë vendit, të cilët mund të kontribuojnë në atë që njihet si “ekonomia e argjendtë”. 

Ndërkohë, projektligji parashikon edhe lehtësira për kategori të veçanta, përfshirë përjashtimin nga tatimi për personat e verbër, duke synuar një mbështetje më të madhe sociale për këtë grup.

Një shtetas 26-vjeçar ka rënë në prangat e policisë pasi u kap në flagrancë në aksin rrugor “Elbasan Tiranë”, teksa transportonte me furgon veshje të kontrabanduara që arrinin vlerën 45 mijë euro. Blutë gjetën dhe sekuestruan në furgonin e shtetasit me iniciale R. K, banues në Korçë, 19 thasë me veshje intime të markave të ndryshme, pa dokumentacionin shoqërues.

Njoftimi i policisë:

“Tiranë/Finalizohet operacioni i koduar “Wrong Way”, goditet një rast në fushën e kontrabandës së mallrave. Transportonte me furgon, veshje të ndryshme, të dyshuara të kontrabanduara, me vlerë rreth 45 000 euro, kapet në flagrancë në aksin rrugor “Elbasan-Tiranë” dhe arrestohet 26-vjeçari.        

Sekuestrohen veshjet dhe furgoni.

Specialistët e Seksionit për Hetimin e Krimit Ekonomik dhe Financiar të DVP Tiranë, në vijim të punës për parandalimin, evidentimin dhe goditjen e veprimtarisë kriminale në fushën e kontrabandës së mallrave, bazuar dhe në informacionet e siguruara në rrugë operative, organizuan dhe finalizuan operacionin policor të koduar “Wrong way”.

Si rezultat i këtij operacioni u arrestua shtetasi R. K., 26 vjeç, banues në Korçë.

Ky shtetas është kapur në flagrancë nga shërbimet e Policisë, në aksin rrugor “Elbasan-Tiranë”, duke transportuar me furgon, 19 paketime (thasë) me veshje të imitimeve të markave të ndryshme, pa dokumentacion shoqërues.

Vijojnë hetimet për dokumentimin e kësaj veprimtarie të kundërligjshme dhe identifikimin e shtetasve të tjerë që mund të jenë të përfshirë. Materialet procedurale iu referuan Prokurorisë së Tiranës, për veprime të mëtejshme.