Maliqi po përballet me një nga ndryshimet më të mëdha administrative të viteve të fundit. Reforma e re territoriale parashikon bashkimin e Bashkisë Maliq me Korçën, një propozim që ka nxjerrë banorët në protestë dhe ka hapur një debat të fortë mbi të ardhmen e zonës.

Por ndërsa në bashki të tjera qytetarët janë ngritur, kanë dalë në rrugë dhe kanë kërkuar të dëgjohen, në Maliq mbetet një pyetje që qarkullon gjithnjë e më shumë: ku është zëri i kryebashkiakut?

Gëzim Topçiu, kryebashkiaku më jetëgjatë i vendit, ka drejtuar Bashkinë Maliq për rreth tri dekada. Sot, përballë një reforme që prek drejtpërdrejt institucionin që ai ka drejtuar për kaq gjatë, qëndrimi i tij duket më shumë “as mish, as peshk”.

Topçiu ka deklaruar se nuk është i qartë se çfarë do të sjellë konkretisht reforma dhe ka kundërshtuar termin “shkrirje”, duke argumentuar se bëhet fjalë për bashkim me Korçën dhe se Maliqi mund të ruajë një strukturë lokale me zëvendëskryetar.

Por pikërisht këtu lind pyetja:

Nëse Maliqi humbet statusin e bashkisë, kush do ta mbrojë këtë institucion? Kush do të ngrejë zërin për qytetarët? Dhe mbi të gjitha, pse protesta nuk ka marrë të njëjtin dimension që ka marrë në zona të tjera?

Ironia është se qytetarët e Maliqit kanë dalë në protestë, ndërsa kryebashkiaku duket sikur po e ndjek situatën nga distanca. Në protestat e zhvilluara janë dëgjuar shqetësime për shërbimet, investimet dhe largimin e vendimmarrjes nga qyteti.

Dhe këtu vjen dilema politike:

A është më e lehtë të luftosh për një bashki kur ke edhe një mandat përpara, apo kur karriera politike lokale është drejt fundit?

Nëse reforma miratohet, Maliqi mund të mos ketë më një kryetar bashkie të zgjedhur drejtpërdrejt. Vetë Topçiu ka pranuar se në skemën e propozuar nuk do të ketë kryetar bashkie, por një zëvendëskryetar funksional.

Prandaj, sot qytetarët kanë të drejtë të pyesin:

Pse në Maliq nuk dëgjohet një zë më i fortë?

Sepse kur rrezikohet një institucion që është drejtuar për 30 vite, pritet të ketë një reagim po aq të fortë.

Për momentin, Maliqi duket sikur po lufton për të ardhmen e tij, ndërsa në krye të bashkisë mbetet një kryebashkiak që, pavarësisht deklaratave, nuk po jep përshtypjen e një përballjeje të fortë politike.

“As mish, as peshk” – as e mbron fort bashkinë, as duket se po dorëzohet.

Ndërkohë, ora e reformës po ecën.

Dhe pyetja mbetet: kush do ta mbrojë Maliqin?