Një 31-vjeçar, i shpallur në kërkim prej rreth një muaji për tre raste vjedhjesh në juglindje të vendit, është arrestuar nga Policia e Korçës. Në pranga ka rënë shtetasi me inicialet E. Z., i dyshuar për vjedhjen e një sasie të konsiderueshme materialesh në një fabrikë, një magazinë dhe një banesë.
Sipas të dhënave paraprake, vlera e sendeve të vjedhura në këto tre raste kap shifrën e mbi 5 milionë lekëve të vjetra.
31-vjeçari ishte shpallur në kërkim pas hetimeve të kryera nga strukturat policore, të cilat arritën të zbardhnin tre ngjarjet.
I arrestuari rezulton një emër i njohur për policinë, pasi ka precedentë penalë në fushën e narkotikëve.
Pas arrestimit, materialet procedurale i janë referuar Prokurorisë për veprime të mëtejshme, ndërsa vijojnë procedurat ligjore për dokumentimin e plotë të rasteve.

