Pse i mbush Berisha sallat?/ Dash Shehi: “E thjeshtë, njerëzit nuk pëlqejnë Bashën i ka çuar gjithmonë drejt humbjes”

Dashamir Shehi, i ftuar në emisionin “Të Paekspozuarit” në MCN TV, ka komentuar faktin që Sali Berisha ka mbështetje maksimale në bazën e PD-së dhe i mbush sallat plotë në takimet e Foltores. Sipas Shehit, për këtë ka shumë arsye, duke filluar nga fakti që Berisha është karizmatik, shumë demokratë i ka promovuar dhe ndihmuar, por edhe fakti se ata nuk pëlqejnë dhe nuk i besojnë Bashës, që i ka çuar gjithmonë drejt humbjes. Shehi gjithsesi, ngre pikëpyetje, lidhur me faktin nëse Berisha ka mundësi të dalë jashtë “mëhallës së PD”, për të mundur Edi Ramën.

Dashamir Shehi tha :


“Berisha është një njeri që ka karizmën e vet, inspiron njerëz. Në 30 vjet politik dhe 15 vjet pushtet, prodhohen miq, tifozë, interesa, të gjitha. Përtej karizëms, shumë nga ata njerëz, Berishën e identifikojnë me fitoren. Dy herë që kanë fituar ata, kanë fituar kur ka qenë Berisha kryetar. Dy herë të tjera që ka qenë zoti Basha, nuk kanë fituar.

E dyta, një pjesë e atyre që nuk kanë qenë me Berishën, që nuk e duan Berishën, shohin një personazh, që mund ti bashkojë dhe që i pranon. E ka treguar në 2005, që edhe ata që ishin sharë e pështyrë, u puqën me njëri tjetrin. Një pjesë prej këtyre edhe i meriton Berisha, sepse janë njerëz që i ka respektuar, kanë bërë karrierë aty.

Janë pastaj edhe për një motiv tjetër, që nuk i pëlqen Basha. Gjykoj që kaq janë goxha arsye, që të mbushen sallat. Puna është kjo, që ne nuk i fitojmë zgjedhjet duke mbushur një sallë, apo me më të fortin në mëhallën tonë, por duke mundur mëhallën tjetër, që është PS. Unë them që ajo është shenjë entuziasmi, për një grup në PD, gjë e mirë se po flitet, por a është e mjaftueshme për të mundur zotin Rama? Për këtë unë kam dyshimet e mia.

Unë po them, me gjithë këtë lloj entuziasmi, nuk mjafton për të mundur palën tjetër, por mund vetëm Bashën. Kjo PD, që mori 35% herën e fundit, mbasi të mbarojë këtë betejën e brendshme, nuk i merr më”, tha ndër të tjera Shehi.