Anthony Athanas, shqiptari nga Korça që priti presidentë e yje në restorantin e tij në Boston

Në restorantin e tij në Boston hynin presidentë, senatorë dhe artistë me famë botërore. Por kur në derë shfaqej një shqiptar, Anthony Athanas shihte para së gjithash një bashkatdhetar.

I lindur në Korçë në korrik të vitit 1911, Athanas u bë një nga emrat më të njohur të komunitetit shqiptaro-amerikan gjatë shekullit të kaluar. Restoranti i tij, “Anthony’s Pier 4”, u kthye në një prej ambienteve më të njohura të Bostonit, ku ndër vite u pritën personalitete të shumta amerikane dhe ndërkombëtare.

Por ata që e njihnin e kujtojnë jo vetëm për suksesin e biznesit, por mbi të gjitha për njeriun pas tij. Buzëqeshja e ngrohtë, mikpritja dhe mënyra e thjeshtë me të cilën priste çdo klient e bënin të ndihej si në shtëpinë e vet.

Pasuria dhe fama nuk e shkëputën nga rrënjët. Athanas mbeti i lidhur me komunitetin shqiptaro-amerikan, me Federatën “Vatra” dhe me Shqipërinë.

Ai u nda nga jeta në maj të vitit 2005, duke lënë pas një emër të njohur jo vetëm në historinë e gastronomisë amerikane, por edhe në kujtesën e diasporës shqiptare.

Anthony Athanas mbetet një prej shembujve të shqiptarëve që ndërtuan një jetë të suksesshme larg vendlindjes, pa harruar kurrë nga vinin.

Fan Noli dhe Anthony Athanas në Boston më 1963

Leave a Reply

This site uses Akismet to reduce spam. Learn how your comment data is processed.