Edhe pse kalendari shënon tetorin, në Durrës duket sikur vera ende nuk ka thënë fjalën e fundit. Temperaturat e këndshme dhe ditët me diell kanë bërë që plazhet e qytetit bregdetar të vijojnë të frekuentohen nga pushuesit.

Në bregdet, panorama të kujton më shumë ditët e fundit të verës sesa një muaj tipik vjeshte. Të shumtë janë qytetarët dhe turistët që kanë zgjedhur të shijojnë rrezet e diellit, shëtitjet buzë detit dhe, për ata më të guximshmit, edhe një zhytje në ujërat e Adriatikut.

Tetori duket se po i dhuron Durrësit një zgjatje të pazakontë të sezonit veror. Plazhet mbeten ende të gjalla, ndërsa atmosfera buzë detit vijon të jetë e qetë dhe relaksuese.

Kjo prani e pushuesve në këtë periudhë të vitit është një tjetër dëshmi se bregdeti i Durrësit mbetet tërheqës edhe jashtë muajve tradicionalë të sezonit turistik.