Luiz Ejlli reagon për protestën studentore: “Një shtet matet nga mënyra se si i trajton njerëzit kur ata nuk pajtohen me të”

Tirana është përfshirë nga protestat, pasi studentë, prindër, të moshuar dhe nxënës të gjimnazit “Partizani” kanë dalë në rrugë në shenjë revolte, pas bojkotimit të mësimit. Sot shënohet dita e dytë e protestës studentore, e cila ka sjellë reagime të shumta edhe nga personazhe të njohur publikë.

Mes tyre është edhe këngëtari Luiz Ejlli, i cili ka reaguar përmes një mesazhi në rrjetet sociale, duke shprehur shqetësimin e tij për mënyrën se si trajtohen qytetarët që ngrihen për të kërkuar të drejtat e tyre.

“Një shtet matet nga mënyra se si i trajton njerëzit kur ata nuk pajtohen me të. Populli nuk duhet të ketë frikë nga ata që paguhen për ta mbrojtur.

Mos e matni dhimbjen e një populli me numrin e njerëzve në shesh, por mateni me numrin e atyre që janë larguar, me ëndrrat që janë shuar dhe me lotët që derdhen në heshtje, larg kamerave”, shkruan këngëtari.

Në reagimin e tij, Ejlli ndalet veçanërisht te protestat e studentëve, duke vënë theksin te dhimbja e atyre që dalin në rrugë për të kërkuar drejtësi, por përfundojnë në një situatë të vështirë.

“Nuk ka britmë më të dhimbshme sesa ajo e një studenti që kërkon drejtësi dhe përfundon duke kërkuar mëshirë.

I lutem Zotit që t’i japë forcë atyre që sot po qajnë, t’i shërojë plagët atyre që janë lënduar dhe të mos lejojë që dhimbja e tyre të harrohet nesër”, përfundon reagimi i Luiz Ejllit.

Mesazhi i këngëtarit vjen në një moment kur protesta studentore vijon të tërheqë vëmendjen, ndërsa kërkesat e protestuesve dhe mënyra e trajtimit të tyre mbeten në qendër të debatit publik.

Leave a Reply

This site uses Akismet to reduce spam. Learn how your comment data is processed.