Goli dhe festa e Bregut në minutën e fundit, Skënderbeu fiton me emocione ndaj Flamurtarit

 

Skënderbeu ka mposhtur Flamurtarin me rezultatin 1-0, në sfidën e parë të javës së 19-të të Kategorisë Superiore. Goli i vlonjatit Dejvi Bregu në minutën e 89-të, i dhuroi triumfin e radhës korçarëve të Ilir Dajës.Shumë tentativa të dështuara nuk kanë përfunduar në mënyrën e duhur nga ana e vendasve, që nuk ishin të saktë me konkretizimin e tyre dhe në një rast janë ndaluar nga traversa.Edhe pse u mendua se do të ishte një sfidë e lehtë, bardhekuqtë vuajtën jo pak, teksa duhet të prisnin plot 89-të minuta për të gjetur golin e fitores.Pavarësisht kësaj fitoreje,motivimi i skuadrës ishte jo ai që pritej….ekipi shfaqi oshilacione, duke nënvlerësuar skuadrat e dorës së dytë…

Ky ishte triumfi i dytë për vitin 2020-të i Skënderbeut, i cili ka parakaluar përkohësisht Vllazninë, duke hedhur vështrimin nga pjesa e sipërme e renditjes. Në sfidën e radhës korçarët do të jenë mysafirë në Laç, ndërkohë që Flamurtari pret Kukësin në shtëpi.

Për sa i përket vlonjatëve, kolona e fitoreve vijon të mbetet 0, teksa rënia nga kategoria duket e pashmangshme.

FT| SKËNDERBEU – FLAMURTARI 1-0

Bregu 89′

KOMENTI LIVE:

Përfundon takimi!

90′ Akordohen 5 minuta shtesë.

89′ GOOOOL SKËNDERBEU 1-0/ Zhbllokohet sfida. Dejvi Bregu kalon në avantazh korçarët! Pas një shpërthimi të Gripshit nga e majta, topi shkon te Krasniqi, i cili gjuan nga brenda zonës, por prek sërish traversën. Aty pranë më pas është Bregu, i cili nuk fal, duke e shtyrë sferë drejt rrjetës.

84′ Tjetër rast ideal për Skënderbeun. Pollozhani jep një pasim të mrekullueshëm për Krasniqin, por ky i fundit nuk arrin ta devijojë drejt portës, topi shkon ngjitur me shtyllën e majtë pingule.

82′ Goditje dënimi për Skënderbeun, nga një pozicion i favorshëm. Provon Gripshi, por topi shkon shumë larg kuadratit.

73′ Mundësi ideale për Flamurtarin, pas krosimit të Kreshpës, Diamanti gjuan me kokë nga brenda zonës, topi shkon jashtë kuadratit.

70′ Shpëton për mrekulli porta e Flamurtarit. Krasniqi lëviz bukur brenda zonës, pas asistit të Marës provon me një gjuajtje, por topi stampohet në traversë.

62′ Drithërima në portën e Flamurtarit, pas një aksioni mjaft të bukur të korçarëve, por për meritë të portierit Moçka, dhe mbrojtësve të skuadrës vlonjate, topi nuk ka shkuar në rrjetë.

55′ Dejvi Bregu rrëzohet brenda zonë dhe kërkon 11-metërsh, por nuk është i këtij mendimi gjyqtari.

46′ Starton pjesa e dytë!

45′ Përfundon pjesa e parë me rrjeta të paprekura

32′ Krasniqi për pak sa nuk arrin ta kthejë në gol pasimin e Imamit, edhe pse më parë loja ishte ndalur për një pozicion të parregullt nga sulmuesi.

29′ Skënderbeu i afrohet golit të avantazhit me afrikanin Ndeki, i cili provon me një gjuajtje diagonale në hyrje të zonës, por topi shkon jashtë kuadratit.

24′ Goditje dënimi për Skënderbeun, harkon Dejvi Bregu drejt zonës, por topi shkon jashtë kuadratit, pa u devijuar nga askush.

20′ Momenti i vështirë në portën e Skënderbeut. Pas një harkimi nga e dajthta, e Artit Hoxhaj, topi mbetet në zonë, pas grushtimi të Koliçit, por më pas topi preket me dorë nga Haruni.

7′ Rast ideal për Skënderbeun. Pas një harkimi të Gripshit nga e djathta, kapiteni Bruno Dita, nuk arrin të shtyjë topin në rrjetë nga shumë pranë vijë fatale.

2′ Eni Imami jep sinjalin e parë me një gjuajtje nga distanca, topi përfundon jashtë kuadratit.

1′ Ka startuar sfida.

FORMACIONET ZYRTARE:

SKËNDERBEU: Koliçi, Meksi, Dita, Pollozhani, Imami, Daja, Elezi, Ndeki, Gripshi, Bregu, Krasniqi. Trajner: Ilir Daja.

FLAMURTARI: Moçka, Gocaj, Nebihu, Qarri, Muçollari, Hoxhaj, Rrapaj, Vrapi, Kreshpa , Haruni, Ribaj. Trajner: Marçelo Troisi.

Leave a Reply

This site uses Akismet to reduce spam. Learn how your comment data is processed.