E dërgoi Skënderbeun në Superiore/ Gvozdenoviç: “Fillimisht erdha këtu si lojtar ..më pëlqen Shqipëria…

Për herë të katërt në historinë e klubit, Skënderbeu u shpall fitues i Kategorisë së Parë. Sezonin e ri, korçarët do luajnë në Superligë, duke u rikthyer pas një sezoni në elitën e vendit. Me 48 pikë, dy më shumë se Dinamo, “Ujqërit e Dëborës” do kërkojnë të përsërisin sukseset e viteve të fundit, aty ku për disa sezone dominuan futbollin në Shqipëri. Një meritë për këtë sukses të bardhekuqve ka edhe Ivan Gvozdenovic, trajneri i Skënderbeut.

Në 26 nëntorin e vitit të kaluar, serbi u ul në stolin e korçarëve duke zëvendësuar Migen Memellin. 44-vjeçari që preferon të luajë me skemën 4-3-3 ia doli që të ngrejë ekipin nga vendi i shtatë drejt titullit kampion, në një kampionat ku ishin disa rivalë për trofeun.

Më parë pjesë e Al-Faisaly, Al-Mojzel, Fortesa Sucaeva apo edhe Saham, ish-mbrojtësi u rikthye te Skënderbeut duke arritur trofeun e parë si trajner. I afruar në Shqipëri për herë të parë te Tirana, ish-futbollisti luajti edhe me Skënderbeun dhe Kukësin, derisa u tërhoq nga futbolli i luajtur në 2015. Në një vend ku paragjykimet etnike janë të përjashtuara, Gvozdenovic udhëhoqi Skënderbeun drejt marshimit të titullit kampion. Veç punës së mirë, trajneri është për t’u marrë shembull edhe për artikulimin e gjuhës shqipe dhe raportet e krijuara me lojtarët.

Në një intervistë të shkurtër me gazetarin Altin Sulçe për “Ora TV”, Gvozdenoviç ka folur për aventurën e tij në krye të Skënderbeut dhe përshtatjen në Shqipëri.

Jo vetëm për mua, për të gjithë ishte shumë e vështirë. Ishim në vendin e 7, 8 pikë larg Flamurtarit dhe Dinamos. Por kur përfundoi puna, ishim të gjithë shumë mirë. Unë isha pak me fat, sepse kishim një grup shumë të mirë. Kishim një grup shumë të mirë shqiptar, me disa lojtarë nga jashtë. Unë kam eksperiencë, kam luajtur për 4 vite këtu pastaj kam ardhur si zëvendëstrajner. Jam nga Serbia, nga Ballkani dhe kemi mentalitet njësoj. Për mua kjo ishte avantazh, ishte një plus për mua. Unë erdha këtu si lojtar, nuk ka rëndësi nëse vij nga Serbia, nga Afrika, nga Bullgaria apo nga Brazili. Mua më pëlqen Shqipëria. Nuk kam pasur asnjë problem këtu, edhe si lojtar, edhe tani si trajner”, ka thënë Ivan Gvozdenoviçi.

Leave a Reply

This site uses Akismet to reduce spam. Learn how your comment data is processed.