Ura në Arrzë të Devollit vijon të jetë e dëmtuar dhe jashtë funksionit, duke krijuar vështirësi të mëdha për banorët e zonës.

Mjetet nuk mund të kalojnë normalisht nga njëra anë e urës në tjetrën, ndërsa banorët detyrohen të përballen me probleme të përditshme për lëvizjen dhe transportin.

Sipas burimeve nga Bashkia Devoll, ndërhyrja për riparimin e urës ndodhet aktualisht në fazat e prokurimit. Megjithatë, për banorët koha që po kalon pa një zgjidhje konkrete po e rëndon gjithnjë e më shumë situatën.

Banorët shprehen të shqetësuar se zona e tyre është lënë jashtë vëmendjes dhe kërkojnë që riparimi i urës të përfundojë sa më shpejt.

Ura është një pikë e rëndësishme për komunikimin e zonës dhe mungesa e saj funksionale ndikon drejtpërdrejt në jetën e përditshme të komunitetit.

Banorët kërkojnë ndërhyrje konkrete dhe jo vetëm premtime, duke shpresuar që procedurat e prokurimit të përfundojnë sa më shpejt dhe ura t’u rikthehet përdorimit.