Alket Rizai është shpallur sërish në kërkim nga autoritetet greke, pasi nuk u paraqit në burgun e Domokos pas përfundimit të lejes së tij. I dënuari shqiptar dyshohet se mund të ketë lidhje me një incident me armë zjarri të regjistruar në orët e para të së dielës në Anavyssos, ku dy persona mbetën të plagosur.
Sipas informacioneve të bëra publike nga autoritetet greke, Rizai duhej të rikthehej në qeli mëngjesin e 14 shtatorit, por nuk u paraqit në kohën e përcaktuar. Policia ka nisur kërkimet për lokalizimin dhe arrestimin e tij.
Kjo ishte leja e 17-të që Rizai kishte marrë që prej vitit 2021. Në 16 rastet e mëparshme, ai ishte kthyer në burg brenda afatit të përcaktuar.
Incidenti në Anavyssos është tashmë një prej pistave kryesore që po hetohen nga autoritetet. Policia greke po analizon pamjet e kamerave të sigurisë dhe provat e mbledhura në vendngjarje, në përpjekje për të përcaktuar nëse Rizai ka qenë i përfshirë në përplasjen me armë.
Një histori arratisjesh spektakolare
Alket Rizai, i lindur më 24 maj 1978 në Balçik, është një prej të dënuarve shqiptarë më të njohur në sistemin penitenciar grek.
Ai u arratis dy herë nga burgu i Korydallos me helikopter, më 4 qershor 2006 dhe më 22 shkurt 2009. Në të dyja rastet, arratisja u krye së bashku me të shumëkërkuarin grek Vasilis Paleokostas.
Në vitin 2013, Rizai tentoi një tjetër arratisje, këtë herë nga burgu i Malandrinos. Gjatë përpjekjes ai mori peng pesë oficerë burgu dhe u dorëzua pas rreth 24 orësh negociata me autoritetet.
Rizai është dënuar dy herë me burgim të përjetshëm për vrasjet e Konstantinos Koutelieris dhe Ioannis Katsios. Për arratisjet spektakolare me helikopter, ai është dënuar gjithashtu me 25 vite burg.
Policia vijon kërkimet
Pas moskthimit të tij në burg dhe incidentit të armatosur në Anavyssos, autoritetet greke kanë intensifikuar kontrollet për gjetjen e tij.
Hetuesit po përpiqen të rindërtojnë lëvizjet e Rizait gjatë orëve para dhe pas incidentit, ndërsa po shqyrtohen edhe dëshmitë dhe materialet filmike të siguruara nga zona.
Deri tani, rrethanat e plota të përplasjes me armë dhe roli i mundshëm i Rizaït nuk janë bërë të ditura zyrtarisht. Hetimi vijon, ndërsa policia greke është vënë në kërkim të tij.

