Këngëtari korçar Endri Prifti ka përcjellë një mesazh të fortë për situatën në vend, duke u ndalur te vështirësitë ekonomike, protestat dhe mungesa e shpresës për të ardhmen, veçanërisht te të rinjtë dhe studentët. Përmes fjalëve të tij, Endri ka shprehur solidaritet me qytetarët që protestojnë, duke theksuar se njerëzit nuk dalin në rrugë pa arsye,
por sepse ndihen të pambështetur dhe nuk shohin më mundësi për të ndërtuar jetën e tyre në Shqipëri.
Një nga momentet më prekëse të mesazhit të tij ishte rrëfimi pasi atij i kishte ikur djali vetëm një muaj më parë, ku shprehej se nuk mund të jetonte më në këtë vend, pasi nuk shihte asnjë të ardhme.
“Nuk jetoj dot këtu, nuk kam të ardhme”, është mesazhi që përcjell dhimbjen dhe pasigurinë me të cilën përballen shumë të rinj.
“Duhet të rriten rrogat, paga minimale të bëhet 80 mijë lekë”
Endri Prifti është ndalur edhe te vështirësitë ekonomike të qytetarëve dhe bizneseve të vogla, duke kërkuar rritje të pagave dhe përmirësim të kushteve të jetesës. Sipas mesazhit të tij, qytetarët kanë nevojë për mundësi reale për të punuar, për të mbajtur familjet dhe për të ndërtuar një të ardhme dinjitoze në vendin e tyre.
Ai ka përmendur gjithashtu vështirësitë me të cilat përballen bizneset, përfshirë edhe sipërmarrjet e vogla, të cilat sipas tij po vuajnë pasojat e situatës ekonomike.
“Kam pesë vite që pres drejtësi”
Në mesazhin e tij, këngëtari korçar ka prekur edhe çështjen e drejtësisë, duke treguar për një histori personale që, sipas rrëfimit të tij, pret zgjidhje prej pesë vitesh.
Prifti ka shprehur pakënaqësinë ndaj institucioneve shtetërore, duke ngritur akuza për korrupsion, ndikime dhe manipulim. Ai ka kërkuar që qytetarët të dëgjohen dhe problemet e tyre të marrin zgjidhje konkrete.
“Lëre dikë tjetër, ti nuk mund ta bësh dot këtë popull të lumtur”
Në fund të mesazhit të tij, Endri Prifti ka përcjellë një thirrje të drejtpërdrejtë për ndryshim, duke theksuar se qytetarët duan të jetojnë me dinjitet, të ndërtojnë të ardhmen e tyre dhe të mos detyrohen të largohen nga vendi.
“Populli nuk ngrihet kot”, është thelbi i mesazhit të këngëtarit, i cili shpreh bindjen se protestat janë pasojë e pakënaqësive të grumbulluara dhe e mungesës së besimit te institucionet.
“Populli do të jetojë, do të ndërtojë familjen e tij. Hape krahun, o vëlla!”, është thirrja përmes së cilës ai kërkon që zëri i qytetarëve të merret seriozisht.
Mesazhi i Endri Priftit rikthen në vëmendje një nga shqetësimet më të mëdha të shoqërisë shqiptare: si mund të ndërtojnë të rinjtë jetën e tyre në një vend ku, sipas tyre, mungojnë mundësitë, siguria ekonomike dhe besimi te drejtësia?
Shikoni videon për mesazhin e plotë të këngëtarit korçar Endri Prifti.
