Kishte munguar për një kohë shumë të gjatë. Pas disa vitesh, këngëtari i serenatave, Mihallaq Andrea me kitarën e tij është ngjitur në skenë sërish tek publiku. Artisi u rikthye me një koncert recital në skenën e Teatrit “Çajupi’. Publiku e kishte pritur për shumë vite dhe nuk e humbi mundësinë për ta ndjekur, në rikthimin e tij. Dhe bashkë me të, këndoi….
Të shumtë ishin në sallën e teatrit të Korçës dashamirësit e artistit, të cilët ndoqën koncertin për rreth një orë e gjysëm, ku herë pas herë së bashku me të kënduan serenatat korçare të kompozuara nga vetë kantautori.
I pranishëm në koncertin rezital të Mihallaq Andreas ishte edhe kantautori Redon Makashi, i cili tha se ishte emocionuese të ngjitej në një skenë me të, këngëtarin që e dëgjonte që në kohën kur ka qenë fëmijë. Ovacionet e publikut e kthyen disa herë Mihallaq Andrean të këndoj në fund të koncertit. Ndërsa për kthimin në skenë, ai tha që do jetë gjithmonë aty kur ta kërkojë publiku.


