Korça rrezikon të përballet me një tjetër paradoks sa i përket arsimit të lartë: godina që investohen dhe rikonstruktohen, ndërsa numri i studentëve vijon të jetë shqetësues.

Në një reagim për A2, pedagogu i njohur Prifti ngre pikëpyetje mbi politikat e investimeve në infrastrukturën universitare, në një kohë kur sfida kryesore mbetet tërheqja e studentëve dhe krijimi i kushteve që të rinjtë të zgjedhin të studiojnë e të qëndrojnë në Korçë.

“Po kthehet si Erseka e ’93”, është paralajmërimi i pedagogut, duke iu referuar rrezikut që qyteti të ketë struktura dhe godina, por të mos ketë mjaftueshëm studentë dhe popullsi për t’i mbajtur ato aktive.

Sipas tij, investimi vetëm në godina nuk mjafton. Pa studentë, programe tërheqëse, mundësi punësimi dhe një strategji për zhvillimin e universitetit, infrastruktura rrezikon të mbetet pa funksionin për të cilin është ndërtuar.

Korça ka nevojë jo vetëm për godina të reja, por edhe për studentë që t’i mbushin ato. Ky është debati që tashmë kërkon përgjigje: ku po shkojnë të rinjtë dhe çfarë po bëhet që ata të zgjedhin Korçën për të studiuar?