E ftuar në emisionin “Goca dhe Gra”, përballë moderatores Ori Nebijaj, Matraku u shpreh se dëshiron të tregojë versionin e saj të ngjarjeve, duke theksuar se situata nuk është ashtu siç duket. Ajo pranoi se ndihet e lënduar nga ajo që ka ndodhur, por kërkoi që historia të shihet në të gjitha dimensionet e saj.

Duke iu kthyer fillimit të njohjes profesionale me kompozitorin, këngëtarja tregoi se e kishte kërkuar për muaj të tërë për të bashkëpunuar me të, për shkak të reputacionit dhe seriozitetit që ai kishte në industrinë muzikore.

Sipas saj, në vitin 2007, ajo i kërkoi Adi Hilës të realizonin një album dhe për këtë projekt pagoi 10 mijë euro. Matraku tregoi se shuma ishte e konsiderueshme për të në atë kohë dhe se paratë i kishte mbledhur nga puna në evente, dasma dhe angazhimi si stjuardesë, ndërsa kishte marrë ndihmë edhe nga miqtë e saj.

Këngëtarja theksoi se investimi ishte bërë për projektin muzikor dhe se mes tyre nuk ka asnjë detyrim financiar të mbetur lidhur me këngët.

“E kam kërkuar me muaj me radhë për të bashkëpunuar, në sajë të profesionalizmit dhe seriozitetit që ai kishte. I kërkova një album dhe e pagova me 10 mijë euro”, tregoi Matraku, duke shtuar se paratë i kishte kursyer me shumë mund.

Ajo shpjegoi se bashkëpunimi i tyre kishte zgjatur rreth katër vite dhe se, gjatë kësaj periudhe, marrëdhënia nuk kishte mbetur vetëm në aspektin profesional.

“E desha këtë njeri, e mbivlerësova”

Një pjesë e rëndësishme e rrëfimit lidhej me ndjenjat që këngëtarja kishte krijuar për kompozitorin. Matraku pranoi se e kishte vendosur atë mes njerëzve më të besuar të jetës së saj, duke i dhënë një rëndësi të madhe në jetën personale.

“Unë e desha këtë njeri, e mbivlerësova këtë njeri dhe e hiperbolizova dhe e vendosa ndër njerëzit më të besuar, duke menduar që ishte Zoti ky, familja dhe më pas vetja ime”, u shpreh ajo.

Matraku tha se ndjenjat e saj kishin qenë të sinqerta dhe se kishte dashur ta bënte kompozitorin të ndihej mirë, duke menduar se ai përballej me ngarkesa profesionale dhe personale.

Megjithatë, ajo sqaroi se në atë kohë kishte besuar se Hila ishte i ndarë nga bashkëshortja. Sipas këngëtares, kur mësoi se situata nuk ishte ashtu siç i ishte paraqitur, vendosi të tërhiqej nga marrëdhënia.

Ajo u shpreh e penduar për atë që kishte ndodhur dhe theksoi se nuk dëshiron të cenojë familjen e kompozitorit, duke kërkuar që përgjegjësitë të kuptohen në kontekstin e plotë të historisë.

Deklarata për videot intime dhe kamerat e sigurisë

Gjatë intervistës, Blerina Matraku foli edhe për publikimin e videove intime, të cilat kanë shkaktuar reagime të shumta. Ajo deklaroi se nuk kishte qenë në dijeni se ambientet ku ndodheshin regjistroheshin nga kamera sigurie.

Sipas saj, ajo kishte menduar se bëhej fjalë për një sistem alarmi, pasi në atë periudhë kishte pasur shqetësime për vjedhje.

“Nuk mendoja që një njeri mund të kishte papërgjegjshmëri morale për të vënë kamera sigurie në dhomat në shtëpi pa dijeninë time. Nëse unë do ta kisha ditur që ajo aty është kamerë sigurie, do ta dija shumë mirë që një kamerë sigurie mund të monitorohet nga diku tjetër. Unë e dija sistem alarmi”, deklaroi këngëtarja.

Matraku u shpreh se ndihet e tradhtuar dhe e përdorur, duke pretenduar se nuk e kishte menduar se momentet private mund të përfundonin të shpërndara publikisht.

Në përfundim të rrëfimit, këngëtarja la të kuptohet se kjo përvojë ka ndikuar thellësisht tek ajo, si në aspektin personal, ashtu edhe në atë profesional. Ajo pranoi ndikimin që Adi Hila kishte pasur në zhvillimin e saj muzikor, por nënvizoi se besimi që kishte krijuar ndaj tij është kthyer në zhgënjim.