Banorët e qytetit të Korçës janë përballur me mungesën e ujit të pijshëm për gati 8 orë, pas një defekti të ndodhur në rrjetin e ujësjellësit në lagjen nr. 17. Problemi teknik ka sjellë ndërprerjen e furnizimit me ujë në disa zona të qytetit, duke shkaktuar vështirësi për familjet dhe bizneset që janë prekur nga kjo situatë.

Mungesa e ujit për një periudhë kaq të gjatë ka krijuar shqetësim te banorët, të cilët janë detyruar të përballojnë nevojat e përditshme pa një nga shërbimet më jetike.

Edhe Deputeti Fidel Kreka ka reaguar ashpër për ndërprerjen e furnizimit me ujë në qytetin e Korçës, duke deklaruar se qytetarët kanë mbetur prej 8 orësh pa ujë të pijshëm.

Në reagimin e tij, Kreka kritikon mënyrën e administrimit të Ujësjellësit, duke e lidhur situatën me largimin e inxhinierëve dhe emërimet partiake.

Ai kërkon rikthimin e menjëhershëm të furnizimit me ujë dhe mbajtjen e përgjegjësve për situatën, duke theksuar se ky shërbim jetik duhet të drejtohet nga profesionistë.