Një aksident rrugor është regjistruar këtë të shtunë në Pogradec–Qafë Thanë, pranë fshatit Udënisht, ku një kamionçinë ka dalë nga rruga pas humbjes së kontrollit nga drejtuesi, duke u përplasur me mbrojtëset anësore dhe më pas është përmbysur.

Fatmirësisht, drejtuesi i automjetit ka arritur të dalë vetë nga mjeti dhe nuk ka pësuar lëndime trupore.

Ngjarja ka ndodhur në një segment rrugor të njohur si “njollë e zezë”, ku ndër vite janë shënuar disa aksidente, përfshirë edhe raste me pasoja të rënda.

Nga të dhënat paraprake dyshohet se shkak i aksidentit mund të ketë qenë pakujdesia e drejtuesit të mjetit, e kombinuar me lagështirën në rrugë, e cila mund të ketë ndikuar në humbjen e kontrollit.

Në vendngjarje mbërritën shërbimet e Policisë, të cilat po punojnë për dokumentimin e plotë të rrethanave të aksidentit.

Pavarësisht përmbysjes së automjetit, ngjarja u mbyll pa persona të lënduar, ndërsa kamionçina pësoi dëme të konsiderueshme materiale.