Ish-Presidenti i Republikës, Bujar Nishani, ka ndërruar jetë mëngjesin e sotëm, një muaj pasi ishte shtruar në gjendje të rëndë në një spital në Gjermani. Nishani kaloi pak kohë më parë më parë COVID-in dhe u trajtua në kushte shtëpie, dhe pas pak ditësh iu shfaqen komplikacione post-Covid. Ai vuante nga një sëmundje autoimune në mëlçi nga e cila nuk arriti t’i tejkalojë pasojat që virusi famëkeq i ka lënë në organizëm. Ish-Presidenti Bujar Nishani prej kohësh mbahej në jetë nëpërmjet aparaturave pasi ndodhej në terapi intensive .
Kush ishte Bujar Nishani, presidenti i 5-të i Shqipërisë

Bujar Nishani u lind në qytetin e Durrësit në 29 shtator 1966. U diplomua në 1988 në Akademinë Ushtarake ‘Skënderbej’ në Tiranë. Deri në vitin 1996 punoi Ministrinë e Mbrojtjes dhe atë të Jashtme në drejtorinë e marrëdhënieve me NATO-n. Në 1996 kreu studime pasuniversitare në SHBA në fushën e mbrojtjes. Ndërsa u diplomua edhe si jurist në vitin 2004 në Universitetit e Tiranës.
Bujar Nishani kishte një karrierë të pasur politike të cilën e nisi në vitin 1991 duke u anëtarësuar në Partinë Demokratike. Në korrik të 2005 zgjidhet deputet i kësaj force politike. Gjatë 8 viteve të PD-së në pushtet ai mbajti detyrat e ministrit të Brendshëm dhe atij të Drejtësisë. Karriera e tij arriti kulmin ne korrik të 2012 ku ai u zgjodh President i Republikës së Shqipërisë detyrë të cilën e mbajti për 5 vite. Pas përfundimit të mandatit Nishani u rikthye sërish në Partinë Demokratike duke mbajtur detyrën e kryetarit të Këshillit Kombëtar. Bujar Nishani lë pas gruan e tij dhe dy fëmijë.
