Korça vijon të presë turistë edhe gjatë muajit shtator. Në rrugët e qytetit, veçanërisht në Pazarin e Vjetër dhe në qendër, shihen grupe turistësh të ardhur nga Greqia, por edhe nga vende të tjera.

Ajo që bie në sy gjatë këtyre ditëve është mosha e vizitorëve. Një pjesë e madhe e grupeve turistike që po vizitojnë qytetin përbëhet nga persona në moshë të madhe, të cilët lëvizin kryesisht në grupe të organizuara.

Ata ndalojnë në Pazarin e Vjetër, vizitojnë qendrën e Korçës dhe shijojnë atmosferën, gastronominë dhe traditat e qytetit.

Por ndërsa turistët vijojnë të mbërrijnë, Korça përballet me një realitet tjetër: tkurrjen e popullsisë dhe largimin e të rinjve.

Kontrasti është i dukshëm. Nga njëra anë, qyteti po tërheq gjithnjë e më shumë vizitorë dhe turizmi po luan një rol të rëndësishëm në ekonominë lokale. Nga ana tjetër, shumë të rinj të Korçës kanë zgjedhur të largohen jashtë vendit apo drejt qyteteve të tjera.

Në rrugët e qytetit, ky ndryshim duket edhe në përditshmëri: turistët vijnë për të zbuluar Korçën, ndërsa një pjesë e banorëve të saj më të rinj kanë zgjedhur të ndërtojnë jetën diku tjetër.