Vijat e bardha në Korçë humbin shkëlqimin vetëm disa muaj pas lyerjes/ Çfarë po ndodh me sinjalistikën?

Korçë – Vetëm disa muaj pasi vijat e bardha në rrugët e Korçës u rifreskuan, një pjesë e tyre tashmë duket se e kanë humbur ndjeshëm ngjyrën dhe shkëlqimin. Në disa prej akseve të qytetit, kalimet e këmbësorëve nuk kanë më pamjen e bardhë dhe të pastër që kishin menjëherë pas punimeve.

Boja është zbehur dhe në zona të caktuara vijat duken të konsumuara, duke ngritur pikëpyetje mbi cilësinë dhe jetëgjatësinë e punimeve.

Çështja nuk lidhet vetëm me pamjen estetike të qytetit. Vijat e bardha janë pjesë e sinjalistikës horizontale dhe kanë një rol të drejtpërdrejtë në orientimin e drejtuesve të mjeteve dhe sigurinë e këmbësorëve, veçanërisht gjatë natës dhe në kushte të pafavorshme atmosferike.

Pyetja që shtrohet është e thjeshtë: si është e mundur që sinjalistika e lyer vetëm pak muaj më parë të ketë humbur kaq shpejt ngjyrën dhe shkëlqimin?

Nëse punimet janë kryer me materiale dhe standarde të përshtatshme, atëherë mbetet për t’u parë se cilët faktorë kanë ndikuar në konsumimin e shpejtë të tyre.

Sepse për qytetarët nuk mjafton që vijat e bardha të duken mirë ditën kur lyhen. Ato duhet të qëndrojnë të dukshme edhe muaj më vonë.

Leave a Reply

This site uses Akismet to reduce spam. Learn how your comment data is processed.