Tragjedi në Korçë/ Makina përplas biçikletën, 60-vjeçari humb jetën në vend

Refat Agolli, 60-vjeçari nga fshati Bulgarec, është viktima e aksidentit tragjik të ndodhur mëngjesin e sotëm në hyrje të qytetit të Korçës. Si çdo mëngjes, 60-vjeçari ishte nisur nga shtëpia me biçikletë, për të shitur qumësht në qytet. Por këtë herë, rrugëtimi i tij i zakonshëm përfundoi në tragjedi.

Për shkak të plagëve të marra nga përplasja e fortë, 60-vjeçari ka ndërruar jetë në vendngjarje.

Ngjarja ka tronditur banorët e zonës, të cilët shprehen se lëvizja me biçikleta dhe mjete të tjera të lehta përgjatë këtij aksi është e zakonshme. Sipas tyre, ndër vite në këtë segment rrugor janë regjistruar disa aksidente, disa prej të cilave kanë përfunduar me pasoja fatale.

Korçë/Informacion paraprak

Rreth orës 07:10, në aksin rrugor “Korçë-Pogradec”, në afërsi të fshatit Bulgarec, automjeti me drejtues shtetasin D. M., rreth 30 vjeç, punonjës policie jashtë shërbimit, është përplasur me një biçikletë që drejtohej nga shtetasi R. A., rreth 60 vjeç.

Si pasojë e përplasjes, shtetasi R. A. ka humbur jetën në vendngjarje.

Drejtuesi i automjetit, shtetasi D. M., po merr mjekim në spital, në gjendje të rëndë shëndetësore. Grupi hetimor dhe Agjencia e Mbikëqyrjes Policore (AMP), nën drejtimin e Prokurorisë, ndodhen në vendngjarje dhe po punojnë për sqarimin e rrethanave dhe shkaqeve të aksidentit.

Leave a Reply

This site uses Akismet to reduce spam. Learn how your comment data is processed.