1 Maji nuk ka nisur mirë në vendin tonë pasi deri më tani janë raportuar 3 aksidente fatale dhe një shpërthim me lëndë plasëse.

Një aksident me pasojë vdekjen e një këmbësoreje ka ndodhur në orët e para të mëngjesit të sotëm në aksin rrugor Pogradec–Korçë, në territorin e bashkisë Maliq. Sipas informacioneve paraprake të policisë, një automjet me drejtues shtetasin D. Xh., ka përplasur një këmbësore, E. M., 43 vjeçe, e cila po lëvizte në anë të rrugës. Si pasojë e përplasjes së fortë, 43-vjeçarja ka ndërruar jetë në vendngjarje.

Një ngjarje e rëndë është regjistruar në orët e para të mëngjesit në lagjen “Mark Lula” të qytetit të Shkodrës, ku një 58-vjeçar ka humbur jetën pasi dyshohet se ka pësuar arrest kardiak ndërsa po drejtonte automjetin e tij. Sipas të dhënave paraprake nga Policia, si pasojë e humbjes së kontrollit, automjeti është përplasur me dy makina të parkuara në afërsi të vendit të ngjarjes.
Pavarësisht ndërhyrjes së menjëhershme dhe transportimit të tij në spital, 58-vjeçari nuk arriti të mbijetojë.

Një tjetër ngjarje tragjike është regjistruar në rrugët e vendit.

Një 71-vjeçar ka humbur jetën ditën e sotme, pasi motomjeti që ai po drejtonte ka dalë nga rruga, në rrethana ende të paqarta. Aksidenti ka ndodhur në aksin rrugor “Memaliaj–Krahës”, në afërsi të fshatit Qesarat, në jug të vendit. Pavarësisht ndërhyrjes së shpejtë të shërbimeve mjekësore, i moshuari ka ndërruar jetë në vendngjarje, për shkak të plagëve të rënda të marra.

Ndërkohë që në Tiranë një shpërthim ka ndodhur në orët e para të mëngjesit të sotëm, rreth orës 03:55, në rrugën “Pjetër Budi”. Sipas njoftimit të Policisë, në një parking pranë një spitali, është vendosur një sasi e vogël lënde plasëse në gomën e përparme të automjetit në pronësi të shtetases M. K.. Si pasojë e shpërthimit ka pasur vetëm dëme materiale, ndërsa nuk raportohet për persona të lënduar.

Një ngjarje e rëndë ka ndodhur mbrëmjen e djeshme në shtetin fqinj, Itali, ku një 27-vjeçare shqiptare është gjendur e pajetë në Montecilfone. Sipas mediave italiane, mësohet se e reja shqiptare është gjetur e lidhur në një pemë pranë të ashtuquajturës “Ura e Sherifit”, përgjatë rrugës midis Larinos dhe Biferninës.

Ishte bashkëshorti i saj ai që e gjeti, një burrë 51 vjeç, që kishte nisur ta kërkonte nga frika se mos ndërmerrte ndonjë veprim ekstrem. Ishte ai që lajmëroi policinë.

Policia e ka marrë në pyetje 51-vjeçarin, por nuk ai për momentin nuk është nën hetim.

Gjithashtu, autoritetet italiane kanë urdhëruar autopsinë e trupit të saj, e cila do të kryhet më 2 maj dhe hetimet janë ende duke vazhduar për zbardhjen e plotë të rrethanave.

27-vjeçarja ishte nënë e një fëmije dhe ishte e ndarë nga 51-vjeçari, ndërsa jetonte e vetme me djalin 7-vjeçar.

Ajo njihej në fshat për angazhimin e saj në punë në një qendër për emigrantët dhe për lidhjen e fortë me të birin, i cili përshkruhej nga të gjithë si qendra e jetës së saj.

Ndërkohë, autoritetet janë shprehur se vetëm autopsia do nxjerrë në dritë të vërtetën, ndërsa për momentin nuk ka asnjë person nën hetim.

Një ngjarje aspak e zakontë ka ndodhur në Spitalin Rajonal të Korçës, ku roja, në gjendje të dehur, ka hyrë në pavionin e sanatoriumit. Ai, nën efektin e alkoolit, është futur në pavion dhe në dhomat e të sëmurëve, ku ka filluar ti shajë e ofendojë.

Pas kësaj, ka ndërhyrë stafi mjekësor ku edhe me këta të fundit (infermierët) është grindur dhe më pas ka goditur një familjar të një pacienti të shtruar.

Është lajmëruar policia e cila ka ndërhyrë për të qetësuar situatën, ndërsa ka bërë edhe shoqërimin e rojës në komisariat.